“Duat, hetia hlim taka kan awm lai hian, ti hian ka
ngaihtuah a, Inneihte kan la duh ve ngei ang a, Engtin nge kan tih zel ang? Chhungte
ti buai ringawt leh harsa taka awm tir che hi ka duh lo, a theih pawh ka thei
lovang ang”.
Julie chu a ngawi
vang vang a, “M.. kei pawh hian ka ngaihtuah ve thin a sin, keipawhin theih
tawp ka chhuah ang a, Pasal te thawhchhuah ringawt ring nih ka duh lo, min
tihlim dawn lo tihna nilovin, ka nulat chhung hian kan Pahnih a, buaina tam tak
kan inneih hunah kan hmachhawn loh nan, ka zirlai ka zawh chuan engtin emaw tal
thawhchhuah leh khawl neih ka duh a ni” a ti ve bawk a. Ka rilrem zawng ni
chiah loh mahse Julie thusawi hi ka hnial ngai lo, Ni e, kei aiin a puitling a,
hmalam hun pawh a thlir thiam em em thin.
Julie nen hian Class XII kan zirlai atanag tawhin kan
inngaizawng ve a, in tihtauh chang nei ve zeuh zeuh thin mahila, vawikhatmah
kan la inthen ngai lo, tunah pawh chhungte leh thiantha zawng zawngte chuan kan
inneih lo reng an ring tawh lo. Kan pahnih inkarpawh midang hriat pawh kan
pawiti em em tawh lo.
BA chu kan zo rual chiah a, kan chhungkaw din hmun ka en
hian Julie neih duh tawh viau mahila, hna nghet ka hmu mai thei silo, Inngai
leh inthlahlel taka awm reng chu kan ning dun ve tawh hle, chuvang chuan Julie
ngaihdan pawh chu rem ti em em lo mahila, ka nupui a la nih miau loh avangin ka
hnial duh ta lova, Bangalore lamah chuan min liamsan ta a.
Chanchin kan inhrilh tawn reng a, kar hnih a awm hnu chuan
Waiter hna a hmuh thu min rawn hrilh a, kan va hlim dun tak em.. Bank account
nupa kan nih huna mi atan a hawnthu ka hriatte kha ava hlimawm tak em…Julie chu
ka ngai em em a, Facebook, Text message, Phone call hmangin chanchin kan
inhrilh reng thin, nikhat chhunga hun hman dan zawng zawng tlailamah min rawn
hrilh thin. Lungleng hle mahila, ka ngaih a tha in, kei pawh a tan theih tawp
in rinawm ka tum sauh sauh thin.
Ni a liam, thla a liam, kum hial a lo vei ve dawn ta,
keipawh vanneih thlak takin Police (ASI) hnaruakah chuan ka lut ve hlauh mai,
mifate IAS, MCS tlingte ain ka lawmna a tlem bik kher lovang. Khel lovah
training pawh ka zo thuai a, Julie pawh chu a hlim kher mai. Kan training chhuah
leh a lo haw lai chu kan innang fuh hlau leh nghal.
Hmalam hun eng tak kan nei ni a ka hriatlai chuan buaina
chhum chuan ka chungah thla a rawn zar ve ta tlat. Ka ngaih em em, ka hmangaih,
ka nun kawng engkim a, ka theih nghilh ngai loh Julie a khawsik a reh thei ta
tlat lo mai. Palai hial tirh ka duh tawh a, mahse damdawiinah chuan ka awmpui
ta tlauh tlauh rih a. Thatlam a pan theih tak lovah chuan a Doctor te pawh an
mangang tawh hle mai. Anatna an hrethei mai silo, a tir chuan khawsik, hritlang
satliahah ka ngai, mahse tunah chuan Julie chu a cherin a dawldang tawh em em
a, ka ngaihtuah em avangin kalsan ka duh
ngai lo. Ka hna ah pawh vawitam ka kal loh phah hial.
Ka office bang chu tlaidang ang bawkin damdawiin lam ka pan
a, ding takin Julie khum ka pan a, mahse a lo awm hauh lo mai. A khum bula mute
hnenah a awmna kan zawh chuan, “verandah lamah kan hawiharh teng tiin a chhuak a nih kha” an ti
a, “Vawiin chu a tho harh deuh a ni maw?” ti rilru chungin a awmna tur awm ang
chu ka pan ve nghal a, ka hlim ru ang reng hle.
Julie chu pawn boruak lum vak lovah chuan thlanglam
thlirin a lo dak reng a, ka auh hriat pawh chuan a rawn hawi vat lo, a
hnunglam atang chuan ka va kuah a, “Min lovan ngai tawh awm ve a… Hei ka lo kal
tawh a lawm” ka ti nghal sawk sawk a, mahse a che eih lo, a en ngai a en reng
a, ka lam chu muang changin a rawn hawi a “M….”(a mittui a luang zawih zawih), “Duat
enga ti nge a? Harsatna I nei em ni? Engnga ti nge ti hian I awm a?”.
“M… Min ngaidam rawh, neihtlak ka nilo a ni. Misual ka nih
hi, I lakah hian thil zep tam tak ka nei, mahse tunah chuan sawi lo thei lo ka
nita, khatia Phaia ka chhuk kha hna ka hmuh mai theih loh avangin ka thawhna
Hotel Manager nen khan kan che sual ta a, hna ka duh luatah ka thianghlimna leh
I tan chauh a tia ka lo serh hran thin chu Hnamdang lakah ka hralh ta a ni.”
(Ka chil ka lem khawlh, ka tawlh hnung dawrh a) “Enga??” “ M.. ka sum duh luat
vang vek a ni, chumai a la ni lo, tunah hian HIV+ ka ni” a in hup sawi zel
turin chakna a nei tawh lo, ka hma ah chuan a thingthi hnawk a, ka ding reng,
Ngaihtuahna thu tam tak a lo lut, midang chan atan emaw,
thawnthubu emaw, film emaw chauh a ka hmuh tura ka duh chu ka chung ngeiah a lo
thleng ta si. Sawi tur ka hre lo, Julie chu ka en thin,a kun reng a, a mittui
chhuatah a far fep fep a, “ Ka huatna leh hmangaihna a inzat ni berin ka hria,
hmangaihtu a mamawh ngawih ngawih, ka pawm ang nge pawm lovang? Ngaituahna a
vak nasa khawp mai,”
Kan hlimdun leh kan inngaihlai chuan “Duat, ka ngai che, ka
kalsan dawn lo che” han tih mai chu a harlo, mahse Min phatsantu, min uire
santu hnenah hlan a ngai erawh mahni inkhawngaihnain khah a awl duh khawp mai.
Mahse tihian ka ngaihtuah a. ti hian ka ti ta a,
“Julie, ka hmangaih che ka tih hmasak ber che kha ila hria
em?(alu a lo bu nghat a) khatah khan I thatlai leh ka chunga I rinawmlai
chauhin KA HMANGAIH CHE, ka ti lo chuvang chuan ka hmangaihna che hi hmangaihna
dik a ni, kan innei emaw nei lo emaw, kan damdun chhungchu tumahin an neih che
ka phal ngai lovang, KA HMANGAIH CHE”.
A mittui kar atang chuan mak tihna a lang tih ka hrethei, Julie
sualna hi ka theihngilh a ni bik lo, ka na ngawih ngawih, a natna pawh a
sualvang a ni, mahse he ka thutlukna avang hian tunthleng hian ka la in chhir
lo, Hmangaihna mawi zia leh ropui zia keimah atangin ka hmangaih Julie chuan a
hmu thei si.
