By Puitea Tuallawt
Ruah phingphisiau sur seng seng kârah kan chûanna train chuan a thlen tumna lam panin hma a sâwn ri tluk tluk a.
Rilru-ah Bawihtei leh a nu an rawn lang a. Ka kalsan dawn laia bawihtei ap ri te, fiah lo taka ‘apa’ tia min kohna ri te kha ka bengah a lo ri nawn leh awn awn a. Bawihtei nu tak pawh kha..a kut lum ther ther te.. ‘duat..zu te kha zu in ve miah suh aw..bawihtei nen kan lo nghak reng dawn che nia, ka hmangaih lutuk che..’ a bianga mittui luang tle ser ser te kha aw....
Bawihtei nu nen hian B.A bul kan tan tirh lai atangin kan inhre tan a, kan inhmuh tirh phat atangin kan inngaina nghal a. Hmangaihna khurah, nitin zantin hmangaihna tui kan châwi dun a. BA Final kan zir kumin ka fa a pai a. Ka fa a pai tih min hrilh zanin kan inru zui nghal; kan inhmangaihna chuan khawvel hi a cho a, kan naupanna theihnghilh thakin nun hi kan chhek arbawm a. Mahse, kan chhungte ve vein inneih an la remti lo.
Kan in iai tawn pawh a ni lo, kan la naupang lulai em a. Nghak deuh rih turin min duh a ni. Bawihtei nu chuan sikul a chawlhsan zui a, kei erawh chu ka nu thu zawmin phai lamah kum thum tal lehkha zir zawm turin ka liam thla ta a ni. Ka zir zawh veleh kan innei ang. Chu chu kan hria.
Ka hmaa TOI chanchinbu hlui tawh tak chu rilru pe lo zetin ka bih kual mai mai a. Chutih lai tak chuan a ni...amah chu ka hmuh ni. Inthlahrung tih hriat takin a lo lut a, ka bul vela vai ho thu ve lah chuan thutna kente chu an tum ikhaw si lo. Ka tho vat a, a bag khai chu ka lak sak a, hmun remchang laiah ka dah a. Ka thutna chu ka kawhhmuh a. A nui seih a, a inthlahrung a ni tih a lang. Heng thil ka tih chhan hi mizo ka nih vang liau liau a ni. Bawihtei leh a nu ka phatsan love!!
Chu chu Melina nen kan inhmelhriat tan dan chu a ni.
Hostel-ah seat ka chan tawh loh avangin ka thianpa nen in kan inluah tawm a. Zirlai kan tan ta. Melina nena kan inhmuh leh hmasak ber chu kan intawn tirh atanga thla khat liam hnu-ah a ni. Bawihte-i leh a nu phone tumin PCO ah midang hman zawh hun nghakin ka thu a. Ka rin aiin ka mi nghah chuan a hmang rei phian a, ka thin a rim hman lek lek tawh tihin a rawn chhuak a, Melina ngei chu!
Tleirawl tê a ni. Min hmuh rualin a nui a, “Aw haw, nang i ni maw...ka pa nen kan inbiâa, ka nu a damlo deuh a ni awm a. Ka hmang rei ta deuh a ni, pawi lutuk, min nghak rei tawh em, i lo ning tawh viau ang a,” a ti a. “Ning love, ka nghahna a la rei lo,” ka ti a, dawt ka sawi a. Phone hmang turin ka lut ve nghal a.
Bawihtei nu chuan tlai lam atanga bawihtei a nawmsam loh deuh thu min hrilh a. Mahse, ngaihtuahawm a nih loh thuin a chhilh thung. Min ngaih tawh zia leh, ka biak khât avanga a vui thu te, kan awmna hmun a nuam em tih te leh thudang tam tak te kan sawi dun a.
Phone ka hmang zo ka chhuak a, pawnah Melina chu a lo la ding reng a. “Ehe..tu nge i la nghah a,a tlai tawh a sin,” ka ti a. Nui har har chungin, “Nangmah ka lo nghak che. A thim tawh sia..keimahin ka haw hreh deuh a, min thlah peih em?” a ti a, an awmna hmun a sawi a. An awmna hmun thlengin ka thlah a. Chu chu Melina nena kan intawn vawi hnihna a ni. Heng thil ka tih chhan hi mizo ka nih vang a ni a. A dang a tel tran em ka hre lo.
Zan ka mut dawn thlenga Melina ka ngaihtuah zui ta deuh tlat mai chu ka inthiam lo tak meuh. “U Zar, train a kan inhmuh hnu atang khan ka rilru-ah i awm reng a, hmuh leh che tumin ka zawng nasa lutuk che. Hmuh tur i awm si lo. Ka zakthei lo min ti em?”
Tleirawl te a ni, a rilru thianghlimzia chu a mitah a lang a. Heng thute pawh hi zak chung chungin a ni a sawi ni. A zak der lo, a zak tak tak a ni. A thinlungah sawi tul tihna a lian ve si a. Thiam leh thiam lovin a sawi ve a ni. A sawi zawngte chuan a hnuk a ulh lo chauh tih a lang reng mai.
An awmna hmun ka kalsan dawn laia varanda atanga min thlir let vawng vawng te chu keimaha keimah hian a hre thei a ni. He tleirawl hian min atchilh dawn a ni lo maw? Keite chu Bawihtei leh a nu ta ka ni tawh. Hraite i cho rual ka ni nem le!!
Mahse, engati nge keia reng reng pawh hi, nupui nei mai tur ka nih thu ka hrilh theih tlat loh le. Engati nge? Engati nge?
Zingah kawngkhar kik dat dat riin min ti harh a, ka thianpa (ka room mate) lah zing class a neih avangin a chhuak daih tawh si. Peih lo zetin ka tho a, kawngkhar ka va hawng a. Melina a lo ding paw pheu mai. Ka phu zawk a, “ Ehe..eng nge i rawn tih dawn?” ka ti a. Ka zawhna avanga chuan Melina nui hmel chu a tim deuh chawih a, inthiam lo lutuk hmel a pu a. “Ka tihpalh a ni. Ka kal leh nghal mai ang,” a ti a.
A banah ka chelh a, “I ho lutuk, lo lut rawh, lo lut rawh. Ka han hmu thut che kha ka hamhaih deuh a lawm mawle.” ka ti a. Ka kai lut a. Ni..engki mai chu a inkahpuk chaw chho ta zawih zawih mai a ni ber e. Chu tleirawl duhawm lutuk nen chuan kan leng chhuak a, hringnun hi kan chhek per chhuai chhuai a. Bawihtei leh a nu hrechang lo lekin phatsanna hlim kawr ruam ka zawh a. Heti ang ka duhin ka dil ngai lo. Kan hlim dun zia te, nun tawlhpahrita nitin kan tawlh dun thin zia te, vanram varanda-a kan intawllen thin thu te sawi vek dawn ila khawvelah hian lengin ka ring lo.
Weekend vawikhat chu leng chhuak dun turin kan in date sa thlap a. Zing karah helhhawlh tih hriat fahran hian mi rawn kaitho a, “U Zar, vawiin kan hun hman tur ka nghakhlel tawh lutuk a, nizan ah pawh ka mu thei tawh lo. Hei zing kar karah ka rawn kal tawp,” a ti a. A nui her her a. A biang tai hlar mai leh a hmui sen vam hiam mai chu..awi ka sawi thei lo Ruatpuia Pa.
Khum atangin ka tho a, chutih lai tak chuan a ni ka thianpain hmanhmawh bilinga min rawn koh a, ka fanu thih thu min rawn hrilh tak ni. Melina chu a kun ngawih a. A thinlung nat dan tur chu ka hmu tlang chiang lutuk. Mahse, engmah sawi hman a ni tawh lo. Thianpa chu ka zui chhuak a, hmanhmawh takin PCO lam kan pan nghal a. Bawihtei nu trap ri ka han hre meuh chu...
Rang takin kan insiam nghal sawk sawk a. Thawmhnaw hak thlak tlem a zawng ka khung khawm a, thianpain thlawhna ticket a lo va la a. Mizoram lama haw ka inpeih a ni der mai. Pindan kil khatah Melina thu kun reng chu engtin nge ka hnem tak ang le?
“U Zar...engati nge min hrilh loh...?” chu zawhna chu kei misual hian engtin nge ka chhan tak ang le. A kut ah ka chelh a, a biang atanga mittui lo luang chuak chu ka malpuiah a far fap a.
Mizoram ka thlen chhoh hnu-ah, rei pawh rial lovin bawihtei nu nen chuan kan innei zui ta nghal a.
Melina chanchin ka hriat leh hmasak ber chu, Mizoram lama a chhungten an fanu bo chungchang chanchinbu a an chhuah chu a ni.
Melina...tleirawl duhawm Khaw nge i awm?
